قصه اماراتيه طويله

الجزء الواحد والخمسين

الساعه 12 في الليل رجع خليفه للبيت..وكان هادي..الكل نايم...قال فخاطره احسن.. لانه مافيه يرمس حد هالحزة.. كان توه بيركب الدري بيروح فوق الا انه سمع صوت...وقف والتفت وشاف امه طالعه من غرفتها واطالعه...
ام سلطان: ييت ابويه..؟!..
خليفه: هي.. وبسير ارقد..تصبحين على خير..
ورد صد عنها بيركب الدري...
ام سلطان: خليفه.... تعال ابويه الصاله اباك شوي...
تافف خليفه فخاطره...
خليفه: امايه انا تعبان وابا ارقد...
ام سلطان: تعال قلت لك...
خليفه: ما تتاجل يعني هالرمسه.؟!!
لبسته امه وماجاوبت..ومشت للصاله وفتحت الليتات ...تبعها خليفها وعلى ويهه علامات الضيق...يلس عدالها..
خليفه: خير امايه؟؟ شو بغيتي؟!....
ام سلطان: ابويه...انته زعلان عليه.؟؟
صد خليفه صوب ثاني...
خليفه: ليش ازعل منج.؟؟؟
ام سلطان: عشان سالفة حصه...
خليفه: امايه دخيلج خليني ارقد..ولا ترجعين لهالموضوع مافيني على عوار الراس...
ام سلطان: كيف يعني ماتبا ترمس فيه؟
خليفه: لا....
ام سلطان: خليفه...انته زعلان لاني اعترضت على حصه في البدايه..!!
خليفه: مب زعلان امايه....بس منصدم منج..عمري ماتوقعت فيوم ولا للحظة انج انتي اللي بتوقفين في طريجي..يعني...انتي مربتنها حصه ويا بنتج...!!!!!
ام سلطان: ادري..خلاص يابويه خذها لا تحط بخاطرك.... صدق انه حصه ماتتعوض...
خليفه: عقب شوو امايه....تراج مب راضيه...
ام سلطان: لا راضيه..
خليفه: لا مب راضيه... لو فرحانه لي جان بين عليج من البدايه مابتعترضين هالكثر عسب شي حصه مالها ذنب فيه...وانتي تعرفين زين انها ملجه بس مب عرس عشان تخافين من شي....!!
ام سلطان: ادري يابويه..خلاص مايصيرخاطرك الا طيب... وانا قلت الرمسه الا جي بدون تفكير.. فديتك لا تزعل ولا تحط بخاطرك انا ماصدقت انك تبا تعرس عشان افرح فيك...خلاص من عقب عرس عنود ان شاء الله برمسهم لك...
سكت خليفه مب عارف يفرح والا شو يسوي بالضبط..قعد يطالع امه بنص عين..مب متاكد من كلامها اذا تعنيه او لا..
خليفه: اماااايه....قولي الصدق.. صدق راضيه والا الا جي تقولين الرمسه عشان ترضيني..؟!!.
ام سلطان: والله اني راضيه وحصه مثل بنتي وغاليه علي... انته بس لا تحط فخاطرك...
ابتسم خليفه ..ارتاح جزئيا من هالكلام ولو انه الرمسه بعدها حازه فخاطره..نش وحب راس امه..
خليفه: تسلمين امايه...ومافي داعي انتي ترمسينهم..انا وابويه بنرمس عمي سيده .. انا مب غريب... وماله داعي هالرسميات....
ام سلطان: ياحافظ عليك ولد محمد استغنيت عن خدماتي اشوفك..!!
ظحك خليفه غصبن عنه...هذي امه ردت مثل قبل....الحمد لله على كل حال...
خليفه: لا فديتج انتي الخير والبركه ومحد يروم يستغنى عنج... بس فعلا ماله داعي...

خلص خليفه رمسته مع امه وكل حد سار حجرته يرقد....
ايام الاسبوع اللي بعده من بداية يوم السبت كانت متروووسه حركة... خصوصا عند عنود اللي كل يوم في الصالون.. (امور نسائية مايخصكم بها لوووول).... يوم الاحد سعيد يا يايب معاه عليا وعيالها...اللي بدورها يابت معاها فساتين البنات ...وكانن اروع مايمكن...
نورة وفاطمه كانن يداومن في الجامعه..عشان جي ماشاركن في نشاطات وايده ويا العايله بسبب الدراسه... بس يوم يتهن عليا ماتن من الوناسه ..لانها ملت عليهن البيت حركه وسوالف... خصوصا عليا هي وميره ربع من زمان فكانت ميره وعيالها دايما في البيت تسولف مع عليا..وحمده بعد نفس الشي...لانه عليا غير..من سنهن ويتفاهمن رباعه... حصه كانت تتحسن يوم عن يوم... بس من يشوفها عبدالله تمشي والا تشل شي والا حتى يالسه..هزبها وقالها تنسدح... ولا تتحرك وايد...لين قامت من نفسها يوم تشوفه ياي والا تشم ريحته حتى تنسدح بروحها مافيها عالمهازب...
عبدالله مسكين كان بروحه متوتر طوال الاسبوع... الشغل عليه وايد..يخلص شغله في المستشفى اللي قام يندمج كفاااايه فيه..وبس يرد البيت ينشغل بامور التجهيزات للعرس...يعني مافيه وقت للراحه....حمدان وخليفه ماكانوا يقصرون معاه...حتى خالد وناصر ..يعني كلهم تساعدوا عشان التجهيزات...
الثلاثاء ركبوا الخيام..خيمتين كبار جدام بيت محمد الكتبي + مساحه خارجية للرزفة وغيره ...وعنود تراقب كل شي من دريشة غرفتها وبطنها يعورها...لين الحين مب مصدقة انه عرسها بعد يومين...!!!..خلاص بتطلع من بيت اهلها وبتروح بيت عمها ...بتسكن معاهم....بيستوي هذاك بيتها...!!!...وفقني يارب...!!

الاربعاء الصبح حريم العايله كلهن تيمعن...بس استصعبن سيرتهن كلهن لصالون واحد...عشان جي قررن حمده وعليا وميره يسيرن صالون...وعنود وفطوم ونوره صالون ثاني... حصه ماراحت لانها ماتقدر..فاتفقت هي مع امها لحناايه يتهم البيت وحنتهم... وتمن في الصالون من الصبح ليييييييييين المغرب ..كله بسبب حنى العرووس اللي طول وايد لين ماخلص... وقت ماخلصن يابهن خليفه ..حمدان من التعب كان راقد وغالق تيلفونه...عشان جي اضطروا يطلبون من خليفه...الدريولية كلهم مشغولين.... خالد ياب الحريم عليا وحمده وميره ورجعهن البيت...
الاربعاء يابوا فستان عنود اللي جهز كليا من حيث ترتيب المقاسات وتظبيط بعض التعديلات عليه... يوم قايسته عنود جدام ميره اختها طلع عليها جناااااااااااااااااااان.... ملاك من صدق.... اما فساتين بنات حمد.. نفس الشي كانت فنانه لكن فستان حصه طلع وسيع شوووووووي عليها..بسبب خسارتها لبعض الوزن بسبب العمليه..لكنها قالت جذي اريح عشان اتحرك بحريه اكثر في العرس....

...:::: ( ليلة العرس ) ::::...

قامت عنود الساعه 10 الصبح..والكل استغرب انها قدرت ترقد هالكثر... اغلب العرايس يقومن من الفجر بسبب التوتر... لكن هي حست بهدوء نفسي واقتناع بنصيبها...وسعادة ماتنوصف....عشان جي كانت مرتاحه البال... مع انها متحمسه ..لكن حماستها داخليه..ومب ظاهر عليها غير الهدوء والثقة... اول ما نشت نزلت تحت...وتمنت انها مانزلت... الكل مرتبش..محد في البيت كلهم في الحوش او برا البيت عند لخيام... ربشتهم خلتها تتوتر شوي... وماعيبها الوضع.. دخلت المطبخ الداخلي ..سوت لها سندويشات جبن وكوب عصير برتقال بارد.. ويوم كانت توها تخلص اعداد السندويش دخلت امها المطبخ...
ام سلطان: هاا فديتج قمتي..؟؟؟
خلت عنود السندويشات عالطاوله وسارت وحبت راس امها ..ساعتها يتها رغبه بالصياح...بس مسكت نفسها..عن استوي عاطفية وايد!!!... امممره مابسكت طول اليوم اذا صحت الحين....
عنود: شو اصبحتي امايه..؟!!
ام سلطان: بخير فديتج...انتي شو حالج اليوم؟
قفطت عنود.
عنود: زينه...
ام سلطان: هههه مب متروعه..؟!!...
هزت عنود راسها بالنفي... يت امها وباستها بين عيونها..
ام سلطان: بارك الله فيج يابنتي...برايج سيري حجرتج...
ابتسمت عنود وشلت سندويجاتها وعصيرها وركبت غرفتها وسكرت الباب....بطلت الدرايش كلهن...الجو اليوم حلوو... كانه يدري بعرسها ويحتفل معاها بهالجوو اللي ينعش... قعدت عنود على كرسي المكتب... وهي مجابله فستان عرسها + الطرحه اللي محطوط عالمسند الخاص فيه...وتتامله...وتتخيل...كيف بتكون بكامل زينتها....عبدالله بيعيبه شكلي او لا..؟؟؟ غصبن عنه بيعيبه...ان شاء الله مايصير شي يخربطلي كل الامور ويعفسني...خلصت ريوقها وقعدت تراقب الشنط اللي بتشلهن معاها... جهزت شنطة صغيره عشان تبات ليله العرس في الجناح اللي في الفندق.. مافي داعي يشلون كل اغراضها لانها بترجع البيت...الشنطة الصغيره حطت فيها كل اغراضها وملابسها واي شي ممكن تحتاجه...بعد ماخلصت انسدحت عالشبريه...شوي ودخلت عليها امها...وقعدت عدالها...وبدت تكلمها..مثل أي ام في عرس بنتها..توصيها على ريلها...وعلى حسن المعاشره...والطيبه والاحترام المتبادل...وتكلمها عن اشياء مختلفه وااايده .... لين ما جشعر يمب عنود من كلام امها وحست بشوية خوف من هالمسؤوليه الكبيره...عمرها ماتصورت ان الزواج جذي... كانت تعتبره انها بتعيش حياتها مع انسان تحبه وتحترمه وبس...لكن كل هالامور صعبه عليها.... لكن ان شاء الله مع الوقت تتعود...
وبعد صلاة العصر يا حمدان وشل عنود هي وشنطتها وفستانها واللي تحتاجه كله ووداها الفندق لجناحها وخلاها هناك عند امها واختها.... وبعدها يت راعية الصالون اللي اتفقت معاها عنود وهي من الشارجه واسمها موورا مكياجها روعه... وبعد سبووح مطووول ومعطر لعنود... استلمتها المزينه كليااااا...

من بعد صلاة العصر والرزفة والدق مشتل جدام البيت... خلاص الرياييل بالنسبه لهم العرس بدا الحين...يحمسوون لين بعد المغرب..وعقب صدق بيخترشون... سعيد كان مع حمدان اللي يراقب وهو يبتسم... والعصا في ايده وهو بعده لين الحين ماتحمس للرزف...الخقاق يقول فخاطره بعطيهم فرصه يظهرون مواهبهم الحين ...وعقب العشا بناكل الجوووو... عبدالله وخليفه رباعه ماتفارقوا...عبدالله رغم حماسه وفرحته كان متوتر...تعليقات الشباب ماخلته فحاله.. ولا قدر ينسى اللي متوتر بسبته... بعد العرس...شو بيصير؟؟؟؟؟؟؟!!!!!!!
بس حاول يتناسى السالفه وكل ماينسى يعلق عليه واحد من الشباب ويرد يتذكر.. وانتوا تعرفون كيف شبابنا غلسين شوي..

في بيت حمد الكتبي البنات كانن رواحهن مرتبشات....يتهن المزينه في البيت حق عليا وحصه ونوره وفطيم اما حريم العيال راحن صالون تعدلن هناك.... بنات حمد كلهن فجن شعورهن... عليا شعرها وايد غليظ وناعم ومقصوص مدرج لوسط الظهر يوصل وطالع وايد روعه عليها... اما نوره وحصه شعورهن طويله بس طبعا حصه اطول شعرها يوصل لين الركب..طبعا كلهن مع تسريحه خفيفه من فوق وجدام..اما الباقي مفتوح...
قراب المغرب رجع عبدالله البيت مع خالد..خالد كان يبا يصلي المغرب وبالمره اييب حرمته للعرس وعياله... اما عبدالله فمن كثر التوتر كان حاس بانه يلزمه سبووح ثاني بااااااااااااااارد....ويوم طلعوا تعاونوا على البنات والحريم وشلوهن الفندق ورجعوا مكان عرس الرياييل...
ترتيب الفندق والقاعه كان ولا اروع...والربشه شاله كل حد... حصه ونوره وفطوم عقن العبي والشيل..اما عليا ولانها حرمه متزوجه تمت بشيله خفيفه... طبعا مافي داعي اقول ان البنات لفتن نظر الجمييع... وام خالد كل شوي تمسك وحده من بناتها وتسمي عليها وتقرا تخاف عليهن من العين... ومب بسبب اشكالهن بس...لكن بسبب ترحيبهن بالحريم وحركتهن والقيام بالواجب... حصه تعبت شوي من الحركه وقررت تروح عند عنود تكلمها وترتاح عندها شوي... اول مادخلت حصه حصلت عنود معاها المصوره ومستلمتنها تصورها كل انواع الصور.. مستغله انفرادها...طبعا عنود كانت ملااااااااااااااااااك... المكياج الناعم زادت ملامحها نعومه...والتسريحه النازله على الظهر كانت فنانه... اول ماشافت حصه استرخت..

الجزء الثاني والخمسين

التفت عبدالله بعد ماسكر الباب لعنود اللي يالسه عالكرسي تبتسم له...ابتسم لها هو بعد وهو يحس بشعور غريب.. رجع الغتره على ورا شوي...متظايق منها..مب متعود على السفرة والعقال... ومايحبها اصلا... ومشا صوب عنود شوي شوي..
عنود وهي اطالعه عرفت انه مرتبك...صح هي مرتبكه اكثر منه محد ينكر هالشي لكن مب باين عليها لانه واثقه منه...واثقة من محبتها له... ومحبته لها...قالت له تبا تغير الجو شوي..
عنود: الحمام انا اول شي....
يلس عدالها وهو يظحك...
عبدالله: هههههههههههههههههههه...انزين يابوج حقج الحمام...بس انتي بطولين ...انا شو بقعد اسوي اروحي.؟؟ ..شو هذا تحتي..؟؟...يوووه لمي فستانج...
ظحكت عليه عنود...
عنود: ههههههههه خل فستااااني.. عبدالله اطلب منك شي..؟... عق السفرة والعقال..
استانس عبدالله
عبدالله: ماااااااااااااااااطلبتي والله....تامرين امر..
مد ايه وشل العقال والسفره والقحفية وسندهن عالكرسي بشكل مرتب عشان ماتجسف السفره.. وبدا يحس بالالفه بينه وبينها بشكل كبير....
عبدالله: تعبانه.؟؟؟
هزرت عنود راسها " لا " ....
عنود: وانته؟؟
عبدالله: تبين الصدق.؟
عنود: اكيــد...
عبدالله: ناش من الفجر..وتعبان..بس ماظني اروم ارقد هههههههههه....
عنود: ليش عادة...؟؟
عبدالله: you know..!!!.. اول مره ارقد ويا بنت ماعرفها....ههههههههههه
عنود: هههههههههه عنلااااتك يالحمار...
عبدالله: افاا... في ليلة عرسنا تسبيني..؟؟
عنود: اعطيك تصور مسبق عن حياتنا في المستقبل....
ابتسم عبدالله .يدري انها تمزح...مسك ايدها ورفعها وباسها...وهو عينه على عيونها..
عبدالله: ابااااها....قسم بالله لوهالحياة وياج كانت سوودا...بعدني ابااااها..
ضغطت عنود على ايده اللي ماسكه ايدها اكثر...
عنود: وانا اوعدك انها مابتكون سوداا...ان شاء الله....
عبدالله: ادري والله...
وسكتوا شوي وهم يطالعون فبعض...حس عبدالله بالجو بدا يتوتر...والعاطفة بدت تسيطر شوي...التفت للحمام ورد اطالع فعيون..
عبدالله: so...؟... منو بيدش الحمام اول..؟
عنود: انته ادخل الحمام ..لاني انابطول وايد بالسبوح..انا بلا شي اطول في الحمام كيف عاد سبوح..؟!...انته تسبح لين ما انا افج التسريحه بتكون انته خلصت سبوح...بعدها ارقد لانك وايد تعبان....
رفع عبدالله حواجبه...
عبدالله: وانتي عادي عندج؟؟؟
عنود: شو اللي عادي عندي..؟
عبدالله: اني ارقد قبلج..؟؟؟
عنود: عبدالله.....انته تعبان وايد الليله..وانا اباك ترتاح.. ماعليك مني لاني ناشه 10 الصبح مب مثلك...
استغرب عبدالله من عنود....وكلامها خلاه يفكر.... معقوووله هالبنت وطريقة تفكيرها ياناس..؟!!!
عبدالله: هههههههههه اهااااا ..انتي هذا اللي تبينه اعترفي...
ظحكت عنود وقفطت..
عنود: ههههههههههههه والله السالفه مب هذي... كل الموضوع اني اباك ترتاح...بس..
تامل فيها عبدالله....
عبدالله: جذي بتكون حياتنا عنود..؟؟ بتبدين راحتي على كل شي...؟؟؟
عنود: طبـــــــعا...
تامل فيها عبدالله بحب...وزال خوفه كله من المستقبل.. وبشر نفسه بحياة حلوه ومستقرة مع عنوده...حس بحبه لها يتظاعف... ويكبر ويزيد...كان خايف كيف بيتصرف كزوج... بس مع زوجه فاهمة ومحبّه مثل عنوودي مافي اي مشكله ان شاء الله....
عبدالله: تعالي...
تقرب منها وخذها بحظنه ولوا عليها...بس شوي وابتعد...وهو عافس ويهه...
عبدالله: كل شي فيج ينغز....( نقعت عنود من الظحك)... هههههه والله عنود.. الواحد مايعرف يلوي على حرمته عدل...
وتمت عنود تظحك عالموقف وهو يطالعها ويظحك وياها... بعد فتره تمالكت عنود نفسها وسكتت ..
عنود: مابتسير تتسبح...
عبدالله: تبين الفكه مني..؟؟
عنود: بكفخك عبدالله شو هالرمسات...بس الوقت تاخر لاه..؟؟
عبدالله: احين بقووم..
نش عبدالله عن الكرسي وبعدها لاحظ ايدها الممدوده له...اطالعها باستغراب..
عبدالله: شو.؟؟ فلوس ماعندي صفّرت...
عنود: هههههههههههه ويا ويهك..هات ايدك بنش عن الكرسي ماروم من الفستان...
ابتسم عبدالله ومسك ايدها ونششها من الكرسي.. راقبها وهي تمشي للتواليت وتقعد وتعق الطرحه..راح عبدالله وفتح شنطته وطلع وزار وفانيله وفوطة...حطهن عالشبرية..راح لعنود عالتواليت وفصخ ساعته وهو يراقبها ويتبسم... عقب ماشاف التسريحه بصم بالعشر انه بيطلع وهي بعدها مب فاجتنها...وايد معقدة شكلها...حط ساعته عالتواليت وشل ثيابه وادواته الصحية ودخل الحمام...

تحت في الفندق كانوا الاهل متيمعين... كل الحريم اللي في الثلاث عوايل.... قوم حمد وقوم محمد..وهل الشارجه.. متلعوزين كيف بيرتبون رجعتهم للبيت..كل حد دق على حد من الشباب.. عشان ايوونهم..
سلطان وحميد يوا وكل حد شل حرمته وام سلطان راحت مع سلطان... وروحوا البيت... خالد يا وشل حرمته وعياله وامه بعد.. وناصر بعد شل حرمته وعياله وحصه... اما سعيد شحن الباقي في سيارته ( فطوم ونورة ومنى ومنال) ووداهن البيت...وفيصل شل امه و عليا و عياله هو بعد..فيصل اصلا سيارته صغيره وماتشل وايدين...
بعد ماخلصوا هالترتيب روحوا بيتهم ... وهم كله يخربطون ويسولفون عن العرس والمعاريس...

عبدالله خلص سبوح في عشر دقايق...ولبس وزاره وفانيلته وغسل ظروسه وهو يفكر كيف عنود بتتصرف يوم بتشوفه بوزار وفانيله..؟؟؟ اكيد بتقفط...وفعلا يوم بطل الباب وطلع حمر ويهها مثل الطماطة... بس هو بالمقابل نقع من الظحك...مب بسبب احمرار ويهها...بس عشان كشتها الناطره ...
عبدالله: هههههههههههههههههههههههههه....
عنود: عبدالله جب...
سار صوبها وهو يفر الفوطه عالشبريه... ووقف وراها وهي قاعده عالكرسي..يطالع راسها..
عبدالله: هههههه شوووووو هاااااااااااذا.... قطعتي شعرج والله ياعنود.. اصبري اصبري...
بعد ايدها عن شعرها وقعد هو يطلع الدبابيز ويبطل التسريحه شوي شوي وهو شكله مايعرف شو قاعد يسوي لكن اونه يساعد...وعنود ميته من القفطه والفشله....وبينما هو قاعد يبطل تسريحتها قعدت عنود تفصخ ذهبها وترده في العلبه... وبعد جهد جهيييد.قدر يبطل التسريحه كامله..بس كان شعرها يابس.. مد ايده للمشط..
عنود: لالالالالا...بيتقطع ان سحيته الحين خلني بغسله اول عن المثبت..عقب بسحيه..
رجع عبدالله ايده محلها..
عبدالله: على راحتج عيوني...
تحرك وجابلها وهو يتساند عالتواليت ويبتسم ابتسامه شيطانه...
عبدالله: اساعدج في شي ثاني.؟؟؟؟
قفطت عنود....
عنود: ههههههههههه....لا بعلي العزيز مشكور ماتقصر...نششني بس..
ومدت ايدها مره ثانيه له..مسكها ونششها... راحت وطلعت بخجل فظيع فوطه وملابس النوم وكل الملحقات اللي تباها + مشط.. ودخلت الحمام...
وعبدالله يراقبها بتسليه...يوم دخلت الحمام سار صوب الشبريه اللي من الصبح تغريه انه ينسدح عليها ويريح ظهره..واول ما انسدح عليها..
عبدالله: آآآآآآآآآآآآآآآآآآآخ....اسميني تعبان....

في بيت حمد...اول ماوصل سعيد البيت نزلن البنات ونزل هو بعد..كان يطالع نووره بطرف عينه..فستانها .. شعرها المفتوح..ومشيتها.. بس ويهها ما انتبه عليه عدل لانا متغشيه والدنيا ليل...
سعيد: نوووره...!!
وقفت نوره والتفتت...
سعيد: لا تنسين تتسبحين هالمره وتسحين كشتج...ههههههههههههههه
استغربت فطيم اللي ماكانت عارفه شومعناة هالتعليق...
نورة: ههههههههههههههه ياحمار...
سعيد: حمارة انتي..لا تسبين....
فطيم: شو سالفة السبوح..؟؟
نورة: بروحه اخووج يخربط...
سعيد: اخربط.؟؟ انزين ماعليه يام دويس....
نورة: لا تعيب...تراني صدق بسوي ولدي دويس..وانته عاد بتستوي اول "بو دويس" في الدنيا ههههههه...
سعيد: هاهاهاهاي..بايخه ياشيخه....
نورة: ادري اني شيخه...
دخلوا البيت... وكانوا كل الباقين وصلوا قبلهم ودخلوا حجرهم..قوم سعيد اخر ناس واصلين...
تمغط سعيد وهو يمشي ويشوف فطيم تدخل غرفتها ومنى ومنال يروحن غرفة الظيوف الثانيه..معناته هو بروحه بيركب مع نوره.!! ياسلااااااااام على هالحظ الحلو.. كمل تمغيييطه وقال..
سعيد: اليوم من الخاطر بحتل حجرة سعيد...خلاص هذي حجرتي من اليوم ورايح ..
نورة: هههههههههه نحن عندنا مخططات ثانيه...
سعيد: شو هيه..؟؟
نورة: بنحول حجرة فطيم فووووق عندنا.....
سعيد: ياسلام عليج..خليها حق ريلج ويا هالراس...
نورة: ريلي بتكون حجرته تحت في غرفة الضيوف.. عاد اللي يقول من زود ياياااتك علينا ...!!
سعيد: لا تطنزين...
نورة: تعال صدق ليش اختك آمنه مايت..؟؟؟
سعيد: ريلها كسر ريله وهو يلعب كوره... وماتروم تخليه..
نورة: هيييي حليلها....
وصلوا الغرف....
نورة: تصبح على خير سعيد..
سعيد: وانتي من اهله نوااااري..
دخلوا الغرف وعلى طووووووووول الحمام....

في الفندق..عبدالله كان صدق بيرقد.... عنود تاخرت وايد.. نص ساعه في الحمام عنبوو شو تسوي هالكثر..؟؟؟ ليش البنات يتاخرن بسبوحهن اكثر عن الشباب..؟؟؟؟.. يمكن عشان شعورهن..!!.. همممممممممم.. يالله عنود طلعي ..بسج..
عنود داخل الحمام ميته من المستحى..بعد مالبست قميص النوم انصعقت... ماتقدر تطلع جي جدام عبدالله ماتقدر...صح ريلها بس مااااااااااتقدر...تمت محتاره شو تسوي..؟؟؟ بعد شوي اذاماطلعت بيتحسب شي صارلي...وبيي يدق علي الباب.... شو اسوي..!!! استهدت بالله وحاولت تهدي نفسها ..سحبت نفس طويل..وبطلت الباب وطلعت راسها بس...
عنود: عبدالله...!!!
قعد عبدالله عالشبريه..
عبدالله: اخييييييييرااا....
عنود: طالع..!!..انا ماقلت لك ارقد....؟!..
عبدالله: انتي لمي ثمج وتعالي....
عنود: عبدالله ماااااااااقدر...استحي والله...
عبدالله: ههههههههههههههههههه تستحين مني..؟؟؟
عنود: هي والله انته اكثر شي استحي منه....
عبدالله: هههههههههههه... اغمض عيوني..؟
عنود: ياريت والله....
عبدالله: كل ليله تبيني اغمض عيوني عنوود.؟!!..
عنود: لالالالالا بس الليله عبود والله....
ظحك عليها عبدالله فخاطره.... وغمض عيونه عشانها...
عبدالله: يالله تعالي غمضت عيوني...
عنود: احلف..؟؟؟؟
عبدالله: طالع..!!...والله غمضت تعااالي...
وايجت عنود مره ثانيه اطالعه...فديته صدق مغمض عيونه...طلعت من الحمام شوي شوي متردده...
عنود: لا تبطل عيووونك اشوفك....
عبدالله: خلصيني انتي....
ركظت عنود للشبريه وسحبت اللحاف وقعدت عالشبريه وتغطت به...استر جذي...ياحيه..
عنود: بس خلاص بطل عيونك..
بطل عبدالله عيونه واطالعها.... لافة شعرها بفووطه كبيره..ووييها خالي من المكياج وملائكي وحلوو...
عبدالله: اععععععععععععع بانت شيانتج من بعد المكياج....!!
انصدمت عنود وبرطمت....هي تدري انه يمزح بس بعد..!!...
عبدالله: هههههههههههههههههههه امزح امزح والله... صدقيني احلى جذي..
عنود: عيونك الحلوه..
سحبت الفوطه عن راسها وطاح شعرها فحظنها... قعد عبدالله يراقبها وهي تنشف شعرها الطويل والغليظ..كان خاطره يمسكه ويحطه على ويهه ويشمه.... بس تمالك نفسه... سال بفضول..
عبدالله: متى بترقدين..؟؟؟
ابتسمت عنود مستحيه...
عنود: يوم حد يبند هالليت المزعج..انا ماعرف ارقد بالنور...
عبدالله: وافترض اني انا اللي بقوم ابنده هاااا..؟؟
عنود: هي.. نفّـــــــــــــاع عبادي...
هز راسه عبدالله...اليوم براعي مشاعرج يابنت محمد ..لكن باجر ماااااااااااااااافيه.... نش عن الشبريه وبند الليت... ورجع لها وهو يتبسم

الجزء الخامس والخمسون



في الليل يوم الاربعاء..رجعت حصه تصلي صلاة الاستخاره للمرة الثانيه..عل وعسى عالصبح يطلع معاها شي…وبعد ماصلتها نامت..وسبحان الله…حلمت في نومها انها بفستان الزفاف وكانت تبتسم بسعاده…لمحة بسيطه كانها ذكرى ماره عالخط السريع…لكنها تثبت في البال…واول ماقامت حصه من النوم وتذكرتها..ابتسمت…اللمحه او الرؤيا البسيطه هاي مهما كانت صغيره لكنها مفرحه…قامت من الشبريه حتى بدون ما اطالع الساعه كم..ودخلت الحمام تتسبح…خلاص..هذا نصيبي…بنزل اقول لامي رايي بدون تفكير يديد في الموضوع…بتقول لامها انها موافقه…يكفي الحلم اللي حلمته… مب هذي علامة من ربي عشان ترشدني باني بكون سعيده بالزواج..؟؟؟.. بتوكل على ربي على كل حال….
كانت الساعه 11 يوم الخميس …. نزلت حصه وحصلت نورة وفطيم مشتطات… يفرغن غرفة فطيم ويرتبن الاغراض..شكلهن من الحين يبن ينقلنها فوق…
حصه: شووو تسون من صباح الله خير…
نورة: الناس الضحى… ماعندنا وقت نبا نخلص حجرة فطيم اليوم …عالاقل الاشياء الاساسية…
حصه: وين اماية؟
فطيم: سارت العزبه…
حصه: لااااااااااه.؟؟…هممممممم اساعدكن..؟؟
نورة: لالالالالالالالالالالالالا….تبين عبدالله يذبحنا..!!
حصه: ليش عاده…انا بخير الحين….بساعدكن باشياء بسيطه مابشل ثقيل انزين….وين الخدامه عنكن؟
نورة: تطبخ الغداا…
حصه: احين شو بخصوص الاثاث..؟؟ فطيم عايبنج اثاث عبدالله..؟؟
فطيم: هي شو بلاه..؟؟
حصه: ماجنه ولادي شوي..؟؟
فطيم: ماعليج بلمساتي السحرية بخليه بناااتي غصب…
نورة: ماعليج منها البنت خبيرة ديكور..
قعدن البنات ينقلن الاغراض ويرتبنها في غرفة عبدالله الفاضية…وبعد ما نقلن الاغراض كلها..خلنها مكوده في الغرفه بلا ترتيب لانهن تعبن…وبيني وبينكم…. كان دبدوب فطيم العوود اللي هو هدية حمدان اول شي انتقل من الغرفه ودخل الغرفه اليديده….بعد ماكودن الاغراض في الغرفة اليديده نزلن تحت..عن الباقين اللي كانوا متيمعين عشان الغدا…
بعد الغدا دخلت ام خالد وبو خالد الغرفة يرقدون.. واستحت حصه تتبع امها عند ابوها ..ماعليه بتقولها عقب...يلسن البنات في الصاله بعد ماراحوا الكل ...وتوهن كانن بينشن عشان يكملن ترتيب الغرفه فوق الا والتيلفون يرن ..ربعت نوره الملقوفه وشافت رقم ناصر عالكاشف..متصل من بيته..
نورة: مرحباااااااااا...
ناصر: نوروه... حمدان متصل قبل شوي يقول عرض الفلم الساعه اربع يبدا... يعني من الحين روحن اجهزن...
نورة: والله..؟؟ ونااااااااااااااااااااسه...
ناصر: ان تاخرتن دقيقه بكنسل..
نورة: وانا مابعطيك سبب صدقني....يالله باااااااي..
وسكر ناصر من دون مايقول باي...ماينلام منقهر انه بيطالع فلم هندي ومع هنود بعد...وخبرت نورة البنات بالخبر وفرحن ...واختبصت فطيم المسكينه اللي اغراضها كلها متلعوزه ..المهم اربع الا ثلث وكلهن مصطفات في الصاله جاهزات للسيرة...ياهن ناصر وكان متسفر على غير العاده...متعوود هو يلبس سفرة وعقال دوم... واطنز عليهن يوم انهن جاهزات للسيره..لو طالب منهن شي ثاني مابيتنشطن جي...شلهن ووداهن لسينما نادي العين...اللي موقعها غريب ومخشوش...وتلاقوا هناك مع حمدان فسيارته..كان ناصر والبنات بعدهم في السياره..نزل حمدان من سيارته وهو لابس نظاراته الشمسيه وعلى ويه ابتسامه حلوه...وتقرب من سيارة ناصر ووقف عداله..
حمدان: هااااااااااه..؟!...شو الاخبار.؟!..
ناصر: بخير والله....هاا احين شو الترتيب..
حمدان: ماشي ترتيب...انا قصيت التذاكر...خمس دقايق وبندخل القاعه..
ناصر: زحمه.؟؟؟
حمدان: لالا....ماشفت وايدين..هذيل اللي تشوفهم انته طالعين من العرض الاولي..
ناصر: اهاااااااا زين...لانه الصراحه انا مافيني عالريحه....
حمدان: ههههههههههههههه ياريال انته وايد مبالغ ترا....اللي ايون هني متطورين غير..مب هنودنا العادييين...
ناصر: والله كلهم والهلا.....نفس الشي...
حمدان: لا بس جد يقولون الفلم شييييييييي... قصة يعني...
نطت نورة من ورا..
نورة: طبعااااااا شي هذا ذوووووقي...
قعد حمدان يسولف معاهم شوي..والبنات كانن متحمسات حدهن....اول مره يحظرن سينما...شي عجيب....ويسجلن كل شي يصير في الذاكره..بعد ما مرن الخمس دقايق نزلوا كلهم مع حمدان...ودخلوا القاعه المظلمة...البنات فجن حلوجهن...الله مثل الافلااااااااام...!!!...ويشوفن كبر الشاشه...كانت فعلا ضخمه...ناصر اختار لهن سيد مافيه ولا هندي قاعد... كان السيد كله فاظي...القاعه تقريبا ربعها بس مليانه اما الباقي كله فاظي...الهنود متجمعين في منطقة وحده بس ...يتلايمون على بعض اونهم....اما الباقي كله فاظي... قعدن البنات بهالترتيب... (فاطمة،نورة،حصة،ناصر) ... وعقن غشوتهن وتحجبن.. حمدان كان يحوص...مني ومنييي مايقر..يوم يا صوبهم ماقعد عدالهم...راقبه حمدان وهو يجدم شوي جدام...مب السيد اللي جدام قوم ناصر..لا..اللي قبله..كان عليه هندي واحد بس قاعد...يعني هندي اصل..الكشه مدهنه ومسحاايه على جنب.. والقميص الكحلي المخطط بابيض..والبنطلون الاسود..ناقص بس زنوبه لكن احترم نفسه ولبس جوتي...سار حمدان وقعد عداااااااااااله امره... فاطمه انتبهت له..اما البنات فكانن يشوفن الاعلانات اللي تسبق عرض الفلم...قال ناصر بصوت واطي لحصه...
ناصر: شوفي...بدينا المصخره ويا حمدان...هني الفلم الاصلي...
صدت بعينها حصه لحمدان ..اللي كان قاعد عدال الهندي ويهز راسه هزة هنود...وكل شوي يلتفت عالهندي اللي عداله ويكلمه بالهندي بكلمات متعارف عليها عند شعب الامارات كافه...والهندي فاج حلجه ويظحك ويطالع حمدان باستغراب...يقول فخاطره شياه هالمخرف يا ولصق فيني..قلت الكراسي.؟!... ونقعت حصه من الظحك... وفاطمه من اول تراقبه وكاتمه ظحكتها...نورة يوم سمعت حصه تظحك هي بعد صدت لحمدان ويوم شافت خدمته ظحكت هي بعد ...بس يوم بدا الفلم طنشن حمدان وقعدن يتابعن... ناصر انسدح في كرسيه...من اول الفلم تململ..معقوله بيقعد كذا ساعه يشوف هالفلم..؟؟؟...البنات كانت منبهرات من كبر الصورة...مبطلات عيونهن يستوعبن كل شي يطلع.. ويشوفن ادق التفاصيل...وكل شوي وحده منهن تلفت انتباه الثانيه على شي معين...بعد ربع ساعه من الفلم نش ناصر...خلاص طفر...اشر لحصه بايده تقعد مكانها ...سار لحمدان اللي داق سوالف مع الهندي ويسوي بايده حركات مع هز راس امممره مثل الهنود...اشر له ناصر عشان اييه...
نش حمدان وسار لناصر..
ناصر: احلف انته بس؟؟ مخلني متململ وانته يالس عدال الهنيدي؟؟..
ظحك حمدان..
حمدان: كسر خاطري يالس ارووحه في سيد كامل فاظي....
ناصر: اسمع..انته بلشتني بوعدك هذا...انته تحمل مسؤولية البنات لين اخر الفلم انا بيي وبشلهن...لاني ماروم اتحمل بسير احوط...
حمدان: بتخليني اروحي..؟؟؟
ناصر: محد قالك توعدهن...بس اقعد مع البنات لاتخليهن روحهن...وقبل مايخلص الفلم بشوي اتصلي وبييكم على طول عشان اشلهن..
حمدان: همممممممممم شحقه خلهن انا بوصلهن..
ناصر: لا ماريد الاهل يدروون انهن وياك..بقولهم انامطلعنهن...
حمدان: اهااااااا فهمتك ..مب مشكله ...مسموح..
ناصر: تمام....يالله فمان الله...
حمدان: الله وياك...
مشى ناصر للباب وطلع وحمدان سار وقعد عدال حصه...الطرف الثاني قاعده فطيم اخر وحده ومايقدر يقعد عدالها ..صح هو جريئ لكن الكراسي متلاصقه ومافيه على لسانها الطويل...يقعد عدال حرمة اخوي المستقبلية ابرك...
حصه: وين سار ناصر..؟؟
حمدان: سار يحوط وبيرد قبل مايخلص الفلم بيشلكن...مايروم يتحمل يشوف فلم هندي ...
حصه: اهاااااا...
ونقلت حصه الكلام اللي صار لنورة ونوره قالت لفطيم....كل الرمسه بالهمس...وبعدها سكتوا يتابعون الفلم..
وقت ماوصل الفلم للوسط...قطعوا العرض للاستراحه... وتشغلت الليتات.... بحلقت نورة بعيونها والتفتت لحمدان..
نورة: شوووووووووه؟؟؟ مابيكملون الفلم؟؟ ماخلص الفلم....
حمدان: يالبقره هذي استرااااااااحه....حد منكن يبا يسير الحمام..؟؟؟
قفطن البنات وهزن روسهن "لا"...
حمدان: بسير اخذ بيبسي وفراخ...لا اتحركن... وبعدين تغشن لو سمحتن لان الليتات شغاااله....
تغشن البنات ونش حمدان وطلع براا...بعد خمس دقايق رجع ووزع البيبسي ..وعلبتين فراخ..وحده لنورة وفطيم والثانيه لحصه وحمدان....قبل نهاية الفلم..في الجزء الاخير...كانت اللقطات محزنه....كلهن قامن يعصرن عيونهن يمنعن الصيحه...والدموع عن تنزل...حمدان كان يظحك ويوايج على ويوههن...يدري انه وحده منهن اخر شي بتبقها بصيحه...بس عمره ماتوقع ان هالوحده تكون فطيم...نزلت دمعتها وعلى طول مشتها..والبوز مبرطم والحاله لله...حمدان بغا يموت من الظحك عليها..خش ايده فمخباه يدور كلينكس حاطنه من قبل فيه...كان يايبنه مع الفراخ والبيبسي...وطلع وحده..ومد ايده لها...
حمدان: اندوج...لا تفحمين عاد فطيم...ههههههههههههههههههههههههههاي..
دزت ايده بالكلينكس اللي فيها ...
فطيم: ويا ويهك...ماتشوف شاروخ بيموت جدام بيت حبيبته..!!... مسكين والله...
حمدان: طالع والله مصدقه...!!!.
كملت فطيم مطالع وهي كل شوي تمش دموعها....ومسك حمدان تيلفونه واتصل بناصر عشان ايي...
وبعد ماخلص الفلم تمن البنات يالسات وهن مب مصدقات ان الفلم خلص...الود ودهن يعيدن العرض من اول ويديد.... صح الفلم قصته محزنه بالاخير بس واايد استانسن عليه...وحمدان ما نششهن يتريا الناس كلهم يظهرون من القاعه..واخر شي ظهروا هم..وكان ناصر يتريا برااا...جدام السيايير.
نورة: مشكوووووووووووووووووور ياحمدان على هالسيرة الممتعة ..وناصر بعد على طولة البال ولو انك خونت فينا وطلعت...
ناصر: عيل تبيني اتحمل هالفلم الطويل..
حصه: فاتك الصراحه رهيب..
حمدان: وعرب صاحوا بعد....
ناصر: لا والله....؟؟ ههههههههه
تحركت فطيم وهي فمكانها بشكل يبين انها انقهرت... وحمدان مكيف عليها ويظحك...ركبوا السيايير وساروا كل حد فدربه...المهم انهن خذن حقهن وسارن السينما...وكانت سيره ولا اروع....تمن يتكلمن عن السيره والفلم طول اليوم...
يوم ردوا المغرب للبيت...ام خالد كانت موجوده....
ام خالد: يالهياتات.... وين تحوطن هااا...؟؟
ناصر: وديتهن امشيهن شوي امايه...
ام خالد: انزين مايخالف لكن ماخبرن حد ولا استاذنن...
ناصر: تراهن وياي حق شو الاذن بعد...
ام خالد: المهم...حصه تعالي ابغيج...
نورة: نحن بنسير فوق نكمل ترتيب حجرة فطوم اليديده...
ام خالد: برايكن....
يلس ناصر وحصه وبينهم ام خالد...
ام خالد: بنتي حصه... صارلج يومين تفكرين واليوم الثالث...وتاخرنا عالعرب....ما وصلتي لراي بعدج...
قفطت حصه ونزلت عيونها للارض..
حصه: بلى امايه...

الجزء السادس والخمسون

الجمعة كان بيت حمد كله معزوم عالغدا فبيت العم محمد..بمناسبه الخطبه طبعا...يعني بشكل عائلي بحت...ومن بعد صلاة الجمعة ساروا كلهم هناك..فطيم ماكانت تبغي تسير بس عشان خواطر بنات عمتها راحت...ماكانت تبغي تشوف حمدان..ولا تحتك فيه...يكفي اللي صار منه..خلاص قررت انها تنسى هالخبل الصايع...صدق مينونه يوم فكرت فيه بجديه...!!...نورة كانت مب عارفه شو الموضوع وشو اللي صار فغيابها.. مع انها سالت فطيم لكن ماردت عليها...حصه كانت ملاحظة التغيير اللي على فطيم وانها عصبت وانقهرت..لكن بما انها حصه...مابغت تدخل بالموضوع...
وصلوا بيت العم والرياييل طلعوا يستقبلون بو خالد وعياله...وام سلطان بعد طلعت تقرب بام خالد وحريمها وبناتها... حصه ونوره اول شي سارن يسلمن على عمهن محمد طبعا مع ميره حرمة خالد..بما انه ابوها..... خليفه تم مييييييييييييييييت محله يوم شاف حصه تقربت...صح كانت متغشيه بس المهم شافها... حتى يوم سلمن سلام جماعي عليه وعلى خوانه ماعرف يرد عليها...من متى ماشفتها..اوووووووووووف...اسميني متووووووووووله....بس اذا بينعقد لساني كل مره اتوله فيها ابرك لي ما اتوله ممررررررررره عيل...دخلن الحريم داخل البيت والرياييل للميلس...
في نفس الوقت اللي طلعوا قوم حمد من بيتهم سايرين صوب بيت محمد... وصلوا قوم عبدالله بتكسي الغزال يايييين من مطار دبي... اونهم بيسوون مفاجأه.. بس المفاجأه كانت لهم يوم وصلوا البيت ودخلوا ماحصلوا حد فيه... وقعدوا يظاحكون عالسالفه.... بس كان فيهم فضول فظيع يبون يعرفون وين ساروا هالجماعه كلهم..؟؟؟.. ان شاء الله مناسبه حلوه مب محزنه....دخلوا قسمهم وريحوا شوي...
في بيت محمد..البنات كانن مستغربات القعده بدون عنووود... صح باقي الحريم سوالف وظحك بس عنود غير..بس كملن القعده بدون تذمر مع باقي الحريم...وخلص الغدا.. وصار وقت الرجعة للبيت احين...
يوم رجعوا البيت... وكل حد سار غرفته يرتاح شوي.. بعد الغدا الدسم هذا... مرت حصه اللي غرفتها اقرب شي لقسم عبدالله اليديد..وشافت الباب مفتوح.. انقهرت من اهمال البشكاره.. وراحت عشان تسكر الباب..بس يوم تقربت شافت شنطتين كبار محطوطات في صالة القسم عدال الباب... وشهقت يوم فتحت الباب حصلت الغرف مسكره...مسود الويه ياعبووود.. مسوي مفاجاه اونه...انخش هو وحرمته ورقدوا اكييييييييييييد... بروح ابشر اماااااااااايه... سكرت الباب وبدلت ثيابها في الغرفه وطلعت تخبر امها..بس هذي الثانيه رقدت ..ماصدقت توصل عشان ترقد شكلها ...بعدين بو خالد داخل واستحت تدخل عليهم...خلتهم وسارت عند نورة تخبرها بالخبر..
فيصل اللي يشتغل بالجمارك..شاف عبدالله في المطار بالصدفه... وعرف انه رد البلاد..بالتالي خبر عليا وعليا خبرت سعيد.... اللي قرر يروح العين يسلم عليهم كلهم لانه اصلا اشتاق لنوره...ويبا عذر عشان يسير هناك ..وشي ثاني انه يبا يودي حق فطوم مصروووفها...لانها مايت البيت هالاسبوع...
العصر نشوا المعاريس وسلموا على كل الاهل.. وطبعا قعدوا معاهم يخبرونهم عن كل شي صار وياهم في ماليزيا... وشي اكيد ان خبر وصولهم انتشر حتى عند خليفه وحمدان..اللي ماصدقوا يحصلون سبب عشان يسيرون بيت عمهم حمد... وسعيد اللي اصلا من الساعه خمس العصر طالع من الشارجه ياي للعين... المهم انه بعد المغرب تقريبا كلهم وصلوا لبيت حمد...خليفه وعبدالله كانوا في الميلس..وحمدان من بعد ماسلم على عبدالله وقعد معاه شوي راح للبيت... ظروري يكلمها هالطويله..مايصير اتم فاهمتنه غلط جي....
سعيد اللي وصل توه وقف سيارته ورا سياره حمدان... يعني من صوب البيت.اللي بيطلع وبيشوف الحوش مابيشوف سياره سعيد لانه سيارة حمدان مغطية عليها... راح سعيد الميلس يشوف منو فيه موجود...
في هاللحظات.. فطوم من سمعت صوت حمدان شردت غرفتها...دخل حمدان الصاله وسلم على اخته عنود والبنات...ماقعد عندهن وايد ..لانه كان متوتر ومب على طبيعته... طلع لبرا الصاله وزقر نورة..
نورة: خير حمدان..؟؟
حمدان: الخير بويهج...نوروه...انا بسير البلكونه..زقريلي فطيم..
نورة: نعمممم..؟؟؟؟؟
تململ حمدان بوقفته وبان عليه الضيج...
حمدان: نوروه فطيم زعلانه مني لسبب هي فاهمتنه غلط..ابا اشرح لها الموضوع بليز...ترومين تيبينها البلكونه بدون ماتدري اني طالبنها...لاانها مابطيع تي...
فكرت نورة بالموضوع... وبسبب تهورها وافقت..طلع حمدان للبلكونه ويلس عالكرسي...بعد شوي يت فاطمه وهي اطالع ويه نوره عدالها بفضول مستغرب...
فطوم: انزين ووصلنا البلكونه وبعدين..؟؟؟
وقف حمدان يوم شافها وصلت...وفطيم انصدمت وفجت ثمها... دزتها نورة دزة خفيفه..
نورة: ايا كان الموضوع بينكم.... حلّــوووه رجاءا لان شكلكم يلوع بالجبد جي....
خلتهم نوره ودخلت عند البنات... وفطوم فكرت تدخل مره ثانيه بس بعد كان فيها فضول تبا تعرف شو يبا حمدان بشكله المتوتر اللي ناااااااااااااادرمايظهربه.. قالت وهي تتصنع اللا مبالاة...
فطوم: نعم ..؟!!
رفع حمدان ايده بتوتر ونزل راسه وهو يحك بصبعه حاجب واحد..بارتباك...
حمدان: آآآ....فطوم انتي...معصبه علي من شي..؟؟
فطوم: وليش اعصب..ومنو اكون انا عشان اعصب...ليش انته سويت شي..؟؟؟
ماحب حمدان هالطريقه بالكلام....
حمدان: لا تكلمييني جي...
فطوم: كيف تباني اكلمك..؟؟
حمدان: مثل قبل...
فطوم: قبل كيف..؟؟
تافف حمدان..
حمدان: باهتمام ..عالاقل....
فطوم: اهاااا..ذاك اول..يوم كنت احس انك جدير بالاهتمام...
ابتسم حمدان بالم وهو منصدم من كلامها....
حمدان: افاااا....يعني احين مب جدير بالاهتمام...؟!!!..
سكتت فطيم وهي اطالع الارض....
حمدان: فطيم..انتي فاهمه شي غلط..انتي زعلانه بسبب البنت اللي كلمتها..انا مابغيت اخبرج عنها لان الله يستر على عباده فليش نحن مانستر عليهم بعد..؟؟... لكن بما انج على موقفج بخبرج..البنت ذيج هي اخت ربيعي...وانا ماعرفها ولا شي..مادري من وين يابت رقمي...تبا تسالني اذا كانت فيه وحده فحياتي.. قتلها موجوده واباها على سنه الله ورسوله وكنت اقصدج انتي... وسكرت بويهها بعد...والله على ما اقول شهيد اذا كنتي مب مصدقه... لا تخلين امور تافهه تاثر على رايج فيني...انا صدق اطفربج واغايظج لكن صدقيني افكر فيج بجدية وعمري مابلعب بمشاعر وحده اعتبرها من الاهل...
تمت فطيم اطالع فويه حمدان ..متاثره بكلامه ومشاعرها متناقضه....معصبه لانه كلم بنت جدامها..بس ماتشك بصدق كلامه في الحقيقه....حمدان مايجذب...اصلا مايعرف يجذب وهو غالبا صريح بمشاعره...فرحانه باللي قاله بانه يفكر فيها بجدية...اخيرا قررت تسامحه....البنت اللي متصله مب العكس عشان هي تعصب... واكيد انه طلع بسبب انه عرف انها اخت ربيعه وخاف يفضح اي شي جدامهن... مسكين حمدان..ليش حكمت عليه بسرعه جي...؟؟...
ابتسمت له
فطيم: حصل خير...
حمدان: يعني مصدقتني...
فطيم: انته تقول الصدق..؟؟
حمدان: هي وقسم بالله.....
فطيم: خلاص عيل مصدقتنك....
ابتسم حمدان....
حمدان: ..... اقولها..؟؟ شكلها وقتها مناسب احين...
ظحكت فطيم...تدري انه يقصد كلمه " احبج"...
فطيم: هههههههههههه لا لا تقولها...
تساند حمدان عالايدار اللي عداله....وهو يطالع ويهها بتسليه.. لاهي عن كل شي..مايشوف حواليه الا فطيم...
حمدان: مب على كيفج.....فطيم....اطالعيني...
اول ما رفعت نظرها له..
حمدان: احبج...
شهقت فطيم...ماواحت تستمتع بسماعها هالكلمه.. غطت ثمها بايدها وهي اطالع ورا كتف حمدان.... عقد حمدان حياته وصد وراه.... وتلاقا مع عيون سعيد اللي اطلع شرااااار...
انصدم حمدان...واستوعب الموقف في ثانيه.....
حمدان: سعيد..!!!!!!!...
لو النظرة تذبح.... جان حمدان وفطيم ثنيناتهم مدفونين حاليا.... سعيد فعلا كان وده يذبحهم..بس عقب مايشرشحهم.... كيف فطيم وبعد كل التوصيات والثقه والدفاع عنها ولصالحها عند الوالد..تخون هالثقه.... وكيف حمدان ربيعي يطعني فعرضي...؟!!!...
ثبت سعيد نظرته على فطيم ... نظرة احتقار وغضب.... فطيم حست انها بتموت لا محاله...دخلت داخل البيت وهي تناهي كانها راكظة ميل.. وركبت فوق على طول لغرفتها وسكرت على عمرها الباب وهي تصيح من الخوف والاحباط والندم....
سعيد كان شاد ايدينه على جنبه...يحاول يمنعهن قد مايقدر انهن مايمتدن لويه حمدان ويكسرن خشمه.... مع انه خاااااااطره يسوي هالشي في هاللحظه....
حمدان كان متوتر حده...مب عارف كيف يشرح الموضوع..
حمدان: سعيد...الموضوع مب مثل ما انته تفكر....
قال سعيد بصوت واطي وهادي...وخطير..
سعيد: صار بينكم موضوع ينرمس فيه بعد ياحمدان..؟!!!..
حمدان: سعيد...امانه لا تفكر غلط.... نحن ماسوينا شي نندم عليه ولا غلطنا...عمري ماغلطت فحقها انا...
سعيد: كل شي اتصوره ياحمدان.....الا انك انته ربيعي تطعني فعرضي... صح الغلط راكبنها هي لكن يركبك انته بعد....هذي اختي....تعرف شو يعني اختي..؟؟؟
حمدان: اعرف بس سعيد اللي صار غصبن عنا ...
سعيد: انته اصلا ماتعرف الحشمه اشوووو....
نورة استغربت التاخير بين حمدان وفطيم وطلعت تشوف شو الموضوع....وشافت سعيد..وانصدمت..ماقالها انه بيي..بس لاحظت الوضع متوتر بينه وبين حمدان ..شكلهم يتنازعوون.....وشهقت..خيييييييبه جان ماشاف فطيم وياه....طلعت برا ..
نورة: سعيييد..هلااا... شو بلاكم...؟
لبسها سعيد وهو مثبت نظرة على ويه حمدان...
حمدان: سعيد بلاك.... انته بنفسك مريت بهالشي من قبل...انا احبها...ماغلطت عليها ..واباها على سنه الله ورسوووله مب العب عليها....