قصه من يحبك كثر ماأحبك أنا.. **

يسلت مروى في بيت عمها جريب الساعه، وسلطان كان يالس معاهم وهو يسولف ومستانس وأم غاليه شكت بالسالفه بس قالت مب وقته أحرجهم..
وصلت غاليه مع زوجها ويلسوا معاهم نص ساعه، وبعدها خالد طلع عنهم وخلى غاليه الي كانت تبا تتسحر اليوم مع أهلها.. وخالد قالها بيرجع لها بعدين..
غاليه: بتاكلين معانا دبوه..؟؟
مروى: لو تبوني..!! بس لو محد يبيني بسير بيتنا..
غاليه: أكيد نبيج، وبعدين من متى هالرقه والدلع..!!
مروى وهي تعطيها نظره: دايما فديتني رقيقه..
سلطان: ومتى بناكل والله إني يوعان..
مروى: والكيكه ماشبعتك..؟؟
سلطان: شبعت شي بداخلي بس بعدني يوعان..
مروى نزلت راسها وسلطان يلس يخزها بنظراته..
غاليه الي شكت فيهم: شو الي شبعته بداخلك..؟؟
سلطان: غاليه أبا أكلمج على إنفراد..
مروى بدا قلبها يدق.. وغاليه حسته خلاص بيخطب مروى، لأنها من يلست وهي ملاحظه نظراته صوب مروى..
قامت غاليه معاه ووقفوا بعيد عن مروى، وكلمها سلطان بكل صراحه إنه يبي مروى..
غاليه: والله ماتمنيت لك غيرها.. تستاهلها شيخة البنات..
سلطان: يعني إنت موافقه..!!
غاليه: أكيـــــــد.. والحين قوم بسير بخبرها..
سلطان: إنزين إصبري نعرف راي عمي..
غاليه: إنت إستشير عمك وأنا بسير بخبرها..
غاليه راحت تخبر مروى الي شوي وبيغمى عليها من الوناسه، وسلطان راح لعمه ولقاه يالس فالميلس مع الشياب ربعه..
يلس سلطان معاهم وبعدين الرياييل إستأذنوا وراحوا.. سلطان مب عارف كيف يدخل فالسالفه وأبوغاليه حس عليه..
أبوغاليه: تبا تقول شي..!!
سلطان: أمممم لقيتها..
أبوغاليه مافهم عليه: شو الي لقيتها..؟!!
سلطان وهو مرتبك: عروستي..
أبوغاليه تشقق من الوناسه: والله.. مبروك تستاهل كل خير..
دخلوا عليهم فهالحظه غاليه وأمها، وأم غاليه شوي وبتطير من الفرحه..
أم غاليه: مبروووك ياسلطان، يازين ما إخترت..
سلطان يبوس راسها: الله يبارك بحياتج.. وليش مخليين عروستي بروحها..؟؟
أم غاليه: لا خلاص ماتقدر تقعد في بيت خطيبها لبعد العرس..
سلطان: يعني مابتزورنا هني خلاص..؟؟
غاليه: شو يعني بيت خطيبها..!! شكلك حلت لك اليلسه هني..
أم غاليه: ههههههههه إنتي ماتدرين.. أنا وأبوج تبنيناه بعد ماتخليتي إنتي عنا.. وقررنا إنه يعيش معانا للأبد..
أبوغاليه: والحين هو وحرمته وعياله بعد..
غاليه: ياسلاااااااام هنت عليكم ترموني من حياتكم..!!
أم غاليه: هههههههههههه إنتي الي رحتي وتركتينا..
دخلت عليهم أم منصور: إنتوا وينكم صار لي ساعه يالسه بروحي..
غاليه: يدووه تعالي شوفي.. سلطان خلاص قرر يستقر وبياخذ مكاني في البيت..
أم منصور: شو يعني..؟؟
أبوغاليه: أميه سلطان قرر يخطب مروى بنت راشد..
أم منصور: ماشاءالله ماشاءالله.. عسى الله يوفقكم إن شاءالله..
سلطان: الله يخليج لنا إن شاءالله.. وتفرحين بعيالنا..
أم غاليه: لا وبيسكنون عندنا بعد..
أم منصور: زين تسوي علشان البنت ماتحس بالغربه بعيد عن أهلها.. كفايه شروق مسكينه راحت آخر الدنيا عن أهلها..
سلطان خلاهم وطلع حاس إنه مستانس لقراره هذا.. مروى طيبه وتستاهل كل خير، والله يقدرني وأسعدها إن شاءالله..
وعمي بعرضه علي هذا بيخليني أوفر البيزات الي بقطها فالإيجارات وبأمن مستقبلنا عدل.. عسى الله لايحرمني منهم إن شاءالله..

باليوم الثاني بالليل غاليه وأهل زوجها يالسين ينتظرون بيت خالها يزورونهم ويشوفون العروس..
أم حميد وصلت ومعاها ميعاد وجميله حريم عيالها، واليهال عواشي ومتعب.. دخلوا ويلسوا يسولفون ويتعرفون على بعض لأنهم إن شاءالله بيصيرون نسايب..
أم حميد: عيل وينها عروستنا..؟؟
أم خالد: موجوده.. غاليه فديتج سيري زقريها..
غاليه: إن شاءالله عموه..
راحت غاليه فوق وشافت خلود مرتبكه ومب عارفه شو تسوي..
غاليه: جاهزه.. يالله يبونج تحت..!!
خلود: أنا خايفه..
غاليه: إنزين هم بس بيشوفونج.. وبعدين إنتي قمر والمفروض ماتخافين..
خلود تشجعت ونزلت مع غاليه، كانت تمشي وتحس إنها ترتجف وخايفه من شي.. دخلت الصاله وسلمت على أم حميد وحريم عيالها ويلست يم أمها..
أم حميد: ماشاءالله عليها.. شخبارج خلود عساج بخير..
خلود بالعافيه طلع صوتها: بخير الله يسلمج..
ميعاد: ماشاءالله عليها قمر بتصك علينا..
خلود ماتت على عمرها من المستحى، وأمها شوي وبتصيح لأنها تحس هالمره خلاص خلود بتروح في نصيبها..
بعد ساعه روحوا الضيوف وهم يوعدونهم فأقرب فرصه بيونهم مره ثانيه إن شاءالله..
غاليه رجعت لغرفتها وهي حاسه بداخلها شي غريب، إحساس يديد عليها عمرها ماعاشته، إحساس إنها فاقده شي أو تدور على شي ومب لاقيته..

مر شهرين على خطوبة عمر وخلود وباجي شهر على زواج سلطان ومروى، في هالوقت غاليه كانت لاهية مابين زواج ولد عمها من بنت عمها والعرس بيكون في بيت أهلها، ومابين الترتيب لملجة خلود وعمر.. وطبعا دراستها الي للحين مستمره فيها..
اليوم عرس سلطان ومروى، كان العرس حلو وفخم، وسلطان ماشاءالله عليه كان مب مقصر على مروى بأي شي، وخلص العرس على خير وسافروا المعاريس فرنسا لشهر العسل..
وتبعهم عمر الي ملج على خلود وكان مستعيل يبي العرس الحين، بس خلود كانت معارضه لأنه مب باجي شي على الكورس اليديد.. وهي ماتبي تعرس في نص السمستر.. وبالعافيه رضى عمر إنه يأجل العرس للصيف..

غاليه الصغيره صار عمرها خمس سنين ودخلت الروضه، يدها ويدتها ربوها أحسن تربيه ومب مقصرين عليها بأي شي.. يعطونها من حنانهم كثر ماعطوا غاليه وزياده..
أبوغاليه. للحين جرح فراق غاليه في داخله بس شو يسوي هذا الله وهذي حكمته.. وبنت غاليه هي بنته بيحطها بعيونه وبيدللها مثل أمها وبيعيشها أحسن عيشه..
أم غاليه.. كانت معترضه على تربية منصور لبنتها غاليه لأنها تشوف الدلع يخرب مب يربي.. بس مع غاليه الصغيره تغيرت نظرتها، وعرفت إنها ممكن تفقد أي غالي بثانيه فلازم تربيها أحسن تربيه وتدلعها بعد.. وإحتفظت بكل ثياب غاليه وألعابها وصورها وكل شي عنها، علشان فيوم من الأيام راح تعطي غاليه الصغيره كل شي، وتقولها شوفي أمج الي ضحت بحياتها علشان تييبج لهالدنيا..
فجر.. شروق.. شذا.. شيماء.. ميعاد.. مروى.. كلهم عايشين وفيين لذكراها وكل وحده منهم سمت وحده من بناتها عليها، وعمام غاليه وشباب العيله بعد محد فيهم نسى غاليه ودايما يذكرونها ويترحمون عليها..
خالد... وصلنا للإنسان الوحيد الي ماقدر يتجاوز أزمة وفاة غاليه حتى بعد مرور خمس سنوات على وفاتها.. عايش في غرفته في بيت أبوه بعد ماترك الوظيفه والدنيا وعاش مع صور غاليه وذكرياتها.. ماقدر يقتنع بوفاتها يحس بها بترجع في يوم، الكل قال عنه مينون، بس من يدخلون عليه الغرفه يلقونه يصلي ولا يقرأ قرآن.. فيتأكدون إنه للحين بعقله..

راحت غاليه ويات غاليه.. راحت الأم والزوجه والصديقه والحب الوفي، وياتهم البنوته الصغيره الدلوعه الي بتملي عليهم حياتهم، وبتكون نسخه مصغره من أمها..
هذي هي الحياة تاخذ وتعطي، وجذاب من يقول الحياة تاخذ ولاتعطي.. كثر مانعطي الحياة تعطينا، وكثر مانبذل ونضحي في سبيل غيرنا الله بيجزينا كل خير..
قصة غاليه.. يمكن تكون مأساويه بس فيها من العضه والعبر الكثير.. أتمنى الي يقراها في يوم يترحم على غاليه، هي صح قصه من نسج خيالي.. بس سبحان الله يمكن في مكان يكون في غاليه وخالد..!!!!!!!!! ويمكن فيه إنسانه محتاجه للدعاء والرحمه في هاللحظه.. إرفعوا أيديكم بالدعاء لإخوانكم وأخواتكم أموات المسلمين.. لأن كلنا محتاجين للدعاء لرب العالمين الذي لاتنام عينه عن عباده الصالحين..